De su welfare a su warfare

di franco de Fabiis

Su Stadu itallianu a corpus de 3,5 milliardus a s'annu, e calancuna borta a corpus de 4,0 milliardus, si stadi indepidendi cun 71 progamus de armamentus.

Ma e po sa scola? Si nanta ca no nc'est nimancu unu sodhu.

Innoi a sighiri fadeus sa listra de custa bella còmpora...
de “guetus” ca a s'acabbu s'at a costai aintru de is 25 a is 40 milliardus.

A) 131 cassabumbardieris F-35, Strike fighter si costant, po dhus comporai totus, 13 milliardus. Ma fortzis calaus a sceti 10 milliardus, chi dhus smenguant a 90.

Sceti po cumentzai custu progamu 2,5 milliardus funti giai stètius spèndius. Chentza de contai totu cudhu dinai chi si at a costai cun sa manu-tentzioni de custas màchinas de guerra. S'ùrtimu prètziu de is aparèchius est giai lòmpiu, de is primus 80 millionis, a 130 millionis de dòllarus a cadeunu. In totu sa vida insoru custus aerus ant a arribbai a 700 millionis cadeunu.

B) 2 sumergìbilis U-212 funti stètius comporaus de sa Germània, anti spèndiu sceti 2,0 milliardus; ma àturus 2 funti de comporai.

C) Finantziadas àtras 4 "fregate", frigaduras, “Orizzonte” FREMM, in totu 1,6 milliardus, balint casi 400 millionis a cadeuna. Custu est unu progamu itàllia-frantza. 2 de custas navis, a s'istadi 2012, funti giai stètias fatas amarai.

D) Po 1,5 milliardus s'Itàllia at pregontau e detzidiu de comporai a su stadu de Israeli 2 aparèchius Gulfstream 5.

E in s'ìnteris in sa scola?

A) 8,0 milliardus anti segaus a sa Scola pùbriga in tres annus, de su 2009 a su 2011, cun “s'arreforma” Gelmini-Tremonti. Boghendinci, apustis de dh'èssiri fata funtzionai po meda annus, 131 milla docentis precàrius. In totu fait su 15% de is docentis de sa scola.

B) In su 2012 fintzas a 1,0 milliardus nci boliat lompi, e cun su sciollòriu de is 6 oras de trabballu in prus po is docentis, su “muntoni” de su guvernu Monti.

C) Is scatus de antzianidadi de serbìtziu chi bolint pagai ocannu, funti is “scartus” de su 2011, nci bolint 384 millionis; e abbastant sceti tres aparèchius F-35 po si pagai a totugantus.

Su dinai po sa scola pùbriga e no po sa guerra.